data-nosnippet>
Ako negdje u ladici, ormaru ili na tavanu još čuvate stari mobilni telefon, nemojte ga bacati – mogao bi vrijediti stotine, pa čak i hiljade eura. Na internetu raste interesovanje za staru tehnologiju, a kolekcionari širom svijeta spremni su platiti visoke iznose za retke i dobro očuvane uređaje.
Primjer koji pokazuje koliko stara tehnologija može postati zlata vrijedan jeste računar Apple-1, koji je početkom godine prodat za čak 375.000 dolara. Taj slučaj nije usamljen – sve više ljudi širom Evrope i svijeta otkriva da stare konzole, mobilni telefoni i prvi modeli pametnih uređaja imaju veliku kolekcionarsku vrijednost.
Najtraženiji su BlackBerry, Nokia, Motorola i prvi iPhone
Prema podacima britanske stranice Gumtree, kolekcionari posebno traže mobilne telefone iz 1990-ih i ranih 2000-ih godina, među kojima se izdvajaju stari BlackBerry, Nokia i Motorola modeli, kao i prve generacije Appleovog iPhonea.
Iako ti telefoni danas nemaju gotovo nikakvu praktičnu vrijednost – jer su stare mreže ugašene i više ne rade – njihova nostalgična i kolekcionarska vrijednost raste iz godine u godinu.
„Ljudi rijetko kupuju stare telefone da bi ih koristili. To su predmeti koji podsjećaju na prošla vremena, djetinjstvo i prve kontakte sa tehnologijom. Mnogi ih kupuju kao investiciju jer im vrijednost raste s godinama“, objašnjava Ben Vud, osnivač Muzeja mobilnih telefona.
Koliko zapravo vrijede stari telefoni?
Na popularnim aukcijskim platformama, poput eBaya, već danas možete pronaći listinge u kojima se stari modeli prodaju po iznenađujuće visokim cijenama:
-
Originalni iPhone (2007) – od 100 do 10.000 funti, zavisno od stanja i pakovanja
-
Vertu Signature – luksuzni modeli dostižu cijenu i preko 10.000 eura
-
BlackBerry Porsche Design (2011) – od 250 do 1.700 eura
-
Klasične Nokije i Motorole – od 30 do 200 eura, u zavisnosti od rijetkosti
Posebno su na cijeni ograničena izdanja i uređaji koji su u originalnom pakovanju sa svim dodacima. Čak i kutija, punjač ili originalna baterija mogu značajno povećati vrijednost predmeta.
Nostalgija i “re-commerce” trend
Fenomen prodaje stare tehnologije postao je poznat kao re-commerce – ponovno stavljanje u promet uređaja koji su godinama skupljali prašinu. Ovaj trend ne samo da donosi zaradu vlasnicima, već i smanjuje elektronski otpad i podstiče održivu potrošnju.
Stručnjakinja za potrošače Kim Faura ističe da ovakva trgovina ne samo što ima ekološki značaj, već pomaže ljudima da shvate skrivenu vrijednost predmeta koje su mislili da su beskorisni:
„Ljudi se često iznenade koliko zapravo vrijedi njihova stara tehnologija. Ponovna prodaja ne samo da donosi novac, već čuva prirodu smanjujući količinu otpada.“
Retro konzole, još jedno skriveno blago
Pored telefona, stare konzole za igrice također su tražene. PlayStation 1 i 2, originalni Xbox, pa čak i Game Boy, postižu sve veće cijene.
Na primjer, PlayStation 2 se danas prodaje za prosječno 45 funti, ali kompleti s igrama i dodatnom opremom dostižu i dvostruko više iznose.
Kako provjeriti vrijednost starog uređaja?
Najjednostavniji način je pretraga na eBayu – jednostavno upišite tačan model i pogledajte po kojoj se cijeni prodaje.
Ako imate neoštećen uređaj sa originalnom kutijom i dokumentacijom, moguće je da imate vrijedan kolekcionarski primjerak.
Stručnjaci savjetuju da prije prodaje uređaj očistite, fotografišete u dobrom svjetlu i priložite sve dodatke, jer detaljna prezentacija može udvostručiti prodajnu cijenu.
Vrijeme je da prekopate tavane
Vrijeme je da zavirite u ladice i tavane – možda se među starim stvarima krije pravo tehnološko blago.
Uređaji koje smo nekad koristili svakodnevno sada postaju vrijedni artefakti digitalnog doba. Iako većina ljudi neće pronaći model vrijedan hiljade eura, činjenica da stari telefon može donijeti i par stotina evra dovoljna je da se upustite u potragu.
Izvor: Nezavisne